CIRCULAR INFORMATIVA SOBRE O PROCESO DE SOLICITUDE DE XORNADA EN SESIÓN ÚNICA DE MAÑÁ PARA O VINDEIRO CURSO
Estimados pais/nais:
Tendo en conta a demanda dun considerable número de familias para que se retome novamente o cambio do tipo de xornada lectiva, a opinión unánime do Claustro de profesoras e profesores que considera a xornada en sesion única de mañá como máis favorable pedagoxicamente e a valoración dos resultados da votación do curso anterior sobre a mesma, parécenos procedente iniciar novamente, de acordo coa Orde do 29 de maio de 2008 (DOG do 6 de xuño) pola que se establece o procedemento para a implantación de dita xornada, o proceso de solicitude para que, se así o desexa a maioría da comunidade educativa, se poida implantar no curso 2011 - 2012.
Segundo establece a normativa vixente, o procedemento a seguir será:
1. Acordo do Consello Escolar e do Claustro de profesores /as, por maioría dos tres quintos.
2. Acordo favorable do 58% do total do censo das nais, pais ou titores legais do alumnado.
3. Plan específico de actividades extraescolares.
4. Solicitude á Xefatura Territorial de educación.
EN QUE CONSISTE A XORNADA ÚNICA?
As cinco horas lectivas de clases danse pola mañá, cando o alumnado está máis receptivo para a asimilación de contidos. Despois segue o servizo de comedor e, pola tarde, dúas horas para realizar actividades extraescolares de carácter voluntario. É dicir, o colexio estaría aberto dende as 7:30 h ata as 18 horas, co seguinte horario:
HORARIO LECTIVO | HORARIO NON LECTIVO | |||||
Horas | Sesións | Tempo | Horas | Sesións | Tempo | |
9:00 – 9:55 | 1ª | 55 m. | 7:30 – 9:00 | Acollida Temperá | 1 h. 30 m. | |
9:55 – 10:50 | 2ª | 55 m. | 14:00 – 15:30 | Comedor | 1 h. 30 m. | |
11:50 – 11:45 | 3ª | 55 m. | 15:30 – 16 :00 | Recreo de comedor | 30 m. | |
11:45 - 12:10 | Recreo | 25 m. | 16:00- 17:00 | Act. Extraescolares | 60 m. | |
12:10 – 13:05 | 4ª | 55 m. | 17:00- 18:00 | Act. Extraescolares | 60 m. | |
13:05 – 14:00 | 5ª | 55 m. | ||||
Os/As alumnos/as de Educación Infantil terán dous períodos de descanso distribuídos de acordo ás súas características e á organización interna do centro.
HORARIO PARA O PROFESORADO
· Horario lectivo: de 9:00 horas a 14:00 horas.
· Horario non lectivo: O profesorado completará o seu horario en sesións de tarde. Todos os martes, de 16:00 a 18:00 horas, permanencia de todo o profesorado no centro:
- 16:00 a 17:00 h: Reunións do Equipo de Orientación, Comisión Pedagóxica, Equipo de Normalización Lingüística, Equipo de Actividades Complementarias e Extraescolares, Claustros e Consellos Escolares.
- 17:00 a 18:00 h: Horario semanal de Titoría para atención a consultas individuais por parte dos pais /nais sobre temas relacionados cos seus fillos /as. ( Sempre se poderá acordar outra hora de atención se nesa non lles fose posible asistir.)
Os demais días de 16:00 h. a 18 horas, permanecerá no colexio un profesor/a que ostentará a representación oficial do Centro, supervisará as actividades extraescolares e manterá en funcionamento a Biblioteca Escolar para préstamo de libros. As quendas do profesorado figurarán no taboleiro.
SERVIZO DE COMEDOR ESCOLAR
O horario do comedor escolar, quedaría establecido dende a finalización do período lectivo, é dicir, as 14 horas, ata o inicio das actividades escolares da tarde, é dicir, as 16 horas. A partires das 15:30 xa se poderá recoller ao alumnado que non teña actividades.
ACTIVIDADES EXTRAESCOLARES QUE SE DESENVOLVERÁN POLA TARDE
Ao fronte das actividades, supervisadas polo profesor/a de quenda, ademais do monitor/a correspondente, responsable de cada unha, estará un pai/nai da ANPA ou a persoa en quen deleguen, que se responsabilizará do seu funcionamento baixo os criterios que previamente establezan. O Plan de actividades extraescolares que se desenvolverán pola tarde, coas matizacións que sexan necesarias segundo a demanda , é o seguinte:
LUNS | MARTES | MÉRCORES | XOVES | VENRES | HORARIO |
-Inglés E.I. -Balonmán | -Hockey -Inglés E.P. | -Inglés E.I. -Basket and English-1 | -Inglés E.P. -Voleibol | -Obradoiro: Técnicas de estudo -Balonmán | DE 16 H A 17 H |
-Patinaxe -Danza galega -Tenis Infantil | -Obradoiro: Estimulación da Intelixencia -Pintura -Voleibol | -Ximnasia rítmica -Basket and English-2 -Tenis Primaria | -Hockey -Danza galega -Pintura | -Kun- Fu -Fútbol | DE 17 H A 18 H |
Este Plan é unha proposta en firme, pois todas as actividades están confirmadas pola entidade correspondente.As actividades ofertadas polo Concello (patinaxe , ximnasia rítmica obradoiro de técnicas de estudo e fútbol ) estarían subvencionadas a e as familias pagarían 1/3 da cuota do mes (24 euros por o curso completo). Hockey (ofertada polo clube Albor), balonmán ( a cargo da Federación), Voleibol, ( a cargo da Federación), Danza Galega, (ofertada pola Deputación) e Basket and English (ofertada polo Concello), serían gratuítas. Inglés e pintura (ofertadas por “Mundo Clase”) custaría 20 euros ao mes. Kun – Fu quedaría en 9 euros ao mes. Tenis sairía en 15 euros ao mes. O Obradoiro de estimulación da intelixencia impartido pola empresa CEGAPSE, custaría 10 euros ao mes. Como verán, segundo o plan proposto, hai diariamente dúas actividades gratuítas (unha cada hora, excepto na última dos venres).
VOTACIÓNS PAIS/NAIS
Realizaranse o día 23 de febreiro, en horario ininterrumpido de 10 a 18 horas, ante unha mesa constituída pola directora e dous pais/nais designados por sorteo público que se realizará ás 12 horas do día 18 de febreiro na sala de profesores/as do centro. Dez días antes das votacións estará exposto no taboleiro interior (por non caber no de fóra ) o censo de pais/nais para comprobar e, se é o caso, corrixir. O voto será directo, secreto e non delegable, emitíndose un só voto por familia . Calquera dúbida poden consultala en dirección. A PARTICIPACIÓN É FUNDAMENTAL!
Ourense, 21de xaneiro de 2010
A Directora
Asdo: Mª Isabel Domínguez Pérez
